बागमतीमा पहिलो पटक काँग्रेसले नेतृत्व गर्दै, मुख्यमन्त्रीमा लामाले आज दाबी पेश गर्ने

मकवानपुर, देश संघीय लोकतान्त्री गणतन्त्रमा रुपान्तरण भएपछि बागमती प्रदेशमा नेपाली काँग्रेसले पहिलो पटक नेतृत्व समाल्हान लागेको छ ।
आज नेपाली काँग्रेस बागमती प्रदेशका संसदीय दलका नेता बहादुर सिहं लामाले बागमती प्रदेशको मुख्यमन्त्रीका लागि आज दाबी पेश गर्ने कार्यक्र रहेको नेपाली काँग्रेसको संसदीय दल, बागमती प्रदेशले जनाएको छ ।
नेकपा एमालेका २७ सांसद र नेपाली काँग्रेसका ३७ सांसदको हस्ताक्षर सहित नेता लामाले प्रदेशको पाँचौं मुख्यमन्त्रीका लागि प्रदेश प्रमुख समक्ष दाबी पेश गर्ने भएका छन् । १ सय १० प्रदेश सभा सदस्य रहेको बागमतीमा मुख्यमन्त्रीका लागि बहुमत जुटाउन ५६ मत आवश्यक पर्छ । जुन सहज रुपमा पुग्छ ।
बागमतीका मुख्यमन्त्री शालिकराम जम्कट्टेलले पदबाट राजीनामा दिएपछि प्रदेश प्रमुख यादवचन्द्र शर्माले साउन ८ गते साँझ ५ बजेभित्र संविधानको धारा १६८ को २ अनुसार सरकार गठनका लागि दाबी पेस गर्न आह्वान गरेका थिए । मुख्यमन्त्रीको दाबी पेशका लागि आज (मंगलबार) बिहान ११ बजे प्रदेश प्रमुखकहाँ जाने नयाँ सत्ता समिकरणका दुई दलको तयारी छ ।
नेकपा एमालेको समर्थनमा नेपाली काँग्रेस संसदीय दलका नेता बहादुर सिहं लामा बागमती प्रदेशको पाँचौं मुख्यमन्त्री बन्न लागेका हुन । यसभन्दा अघि नेकपा एमालेले २ पटक, नेकपा माओवादी केन्द्र र नेकपा एकीकृत समाजवादीले एक–एक पटक प्रदेशको नेतृत्व गरेका छन् ।