देशभरको मौसम बदली, हिमाली क्षेत्रमा हिमपातको सम्भावना ।

काठमाण्डौँ, पश्चिमी न्यून चापीय प्रणालीको प्रभावले हाल बागमती, गण्डकी, लुम्बिनी र कर्णाली प्रदेशको मौसम आंशिकदेखि साधरणतया बदली रहेको छ भने तराई भूभागका केही स्थानहरूमा हुस्सु तथा कुहिरो लागेको जल तथा मौसम पूर्वानुमान महाशाखाले जनाएको छ ।
आज दिउँसो देशभरको मौसम आंशिकदेखि साधरणतया बदली रहने सम्भावना रहेको छ ।
कर्णाली र सुदूरपश्चिम प्रदेशको उच्च पहाडी तथा हिमाली भूभागका थोरै स्थानहरूमा तथा कोशी, बागमती र गण्डकी प्रदेशको उच्च पहाडी तथा हिमाली भूभागका एक–दुई स्थानमा हल्का हिमपातको सम्भावना रहेकोले सोको प्रभावले दैनिक जनजीवन, स्वास्थ्य, सडक तथा हवाई यातायातमा प्रभाव पर्न सक्ने हुँदा आवश्यक सतर्कता अपनाउ महाशाखाले अनुरोध गरेको छ ।
काठमाण्डौँमा बिहान पौने ६ बजेको न्यूनतम तापक्रम ८.६ डिग्री सेल्सियस रहेको छ । दिउँसो अधिकतम तापक्रम २१ देखि २३ डिग्री सेल्सियसको बिचमा रहने महाशाखाले जनाएको छ ।