रुस–युक्रेन युद्धविरामको प्रस्ताव लिएर अमेरिकी वार्ता टोली मस्को पुग्यो ।

काठमाण्डौँ, रुस र युक्रेनबीच युद्धविराम गर्ने सम्बन्धी प्रस्तावमा छलफल गर्न अमेरिकी वार्ताकारहरू रुसको राजधानी मस्को पुगेका छन ।
अमेरिकी राष्ट्रपति डोनाल्ड ट्रम्पका दूत एवं गाजा र युक्रेन द्वन्द्वका मध्यस्थकर्ता स्टिभ विटकोफको नेतृत्वमा अमेरिकी वार्ताकारहरु मस्कोमा पुगेका हुन ।
अमेरिकाले युक्रेनमा ३० दिने युद्धविरामको आफ्नो योजना रुससमक्ष प्रस्तुत गर्ने बिबीसीले जनाएको छ ।
साउदी अरबमा भएको वार्तापछि किएभ अमेरिकी प्रस्तावमा सहमत भएको छ तर मस्कोले अमेरिकी पक्षलाई यो स्वीकार्य छ कि छैन भनेर सङ्केत गर्नुअघि विवरण प्रस्तुत गर्न आग्रह गरेको छ ।
रूसी राष्ट्रपतिका सहयोगी युरी उशाकोभले अघिल्लो दिन अमेरिकी राष्ट्रिय सुरक्षा सल्लाहकार माइक वाल्ट्जसँग फोनमा कुरा गरेका थिए ।
रुसले आफ्नो अर्थव्यवस्थामा भएका विकृतिहरूसँग जुझ्दै कुनै पनि सम्झौताको अंशका रूपमा प्रतिबन्धहरू हटाउन चाहेको समाचार माध्यमहरुले उल्लेख गरेका छन ।